ОХУ-аас нэмэлтээр 25 мянган тонн АИ-92 бвто бензин, 5 мянган тонн онгоцны түлш нийлүүлэх болсноор наймдугаар сарын шатахууны хэрэглээг бүрэн хангах нөөц бүрдүүлэх боломж бүрдлээ.

Ерөнхий сайдын захирамжаар байгуулсан Шатахууны хангамж, нийлүүлэлтийг тогтворжуулах шуурхай штабын мэдээлснээр “Роснефть“ компаниас энэ сард ОХУ-аас 50 мянган тонн АИ-92 авто бензин, 15 мянган тонн Евро-5 бүтээгдэхүүн худалдан авах захиалгыг баталгаажуулж ачиж эхэлжээ.

АҮЭБЯ-ны Төрийн нарийн бичгийн дарга Б.Дашпүрэв ярихдаа, “БНХАУ-аас 5000-6000 тонн АИ-92 авто бензин, Евро-5 төрлийн бүтээгдэхүүнийг худалдан авахаар ачиж эхэлсэн. Онгоцны 3000 тонн түлш худалдан авах гэрээ хэлцэл хийж, эхний 1000 тонныг ачуулсан. Энэ сарын 10-ны байдлаар 10100 тонн нефтийн бүтээгдэхүүнд бүрдүүлэлт хийсэн”-ийг тэмдэглэв.

Мөн ГХЯ-наас олон улсын геополитикийн хурцадмал, тодорхойгүй байдлын улмаас энэ онд дэлхийн зах зээлд газрын тосны бүтээгдэхүүний хямрал болж байгааг онцлов. Иймд Монгол Улсад үүсээд буй шатахууны доголдол нь олон улсын нөхцөл байдлаас хамааралтайг тус яамны хэвлэлийн төлөөлөгч Р.Нямдаваа тодотголоо.

Монгол Улсын хувьд ОХУ, БНХАУ-аас түлш шатахуунаа импортолж байна. Агаарын түлшний импортын эх үүсвэрүүдийг нэмэхэд Казахстан, БНСУ, Беларусь улстай яриа хэлэлцээ хийж байгаа ажээ. 

Нийтэлсэн огноо2026-08-12