Он гарсаар наймдугаар сарын дөрөвний өдрийг хүртэлх хугацаанд Монгол Улс 11.5 сая тонн нүүрс экспортолсныг УУХҮЯ мэдээлж байна. Нүүрсний экспорт өмнөх оны мөн үеэс 10.4 хувиар өсжээ.
Нүүрс болон бусад түүхий эдийн экспорт, тээвэрлэлтийг нэмэгдүүлэх хүрээнд боомтуудын хүчин чадлыг нэмэх, төмөр зам барих зэрэг дэд бүтцийн ажлууд олон жил яригдсан юм.

БНХАУ-ын Гадаад хэргийн сайд Ван Игийн Монгол Улсад хийсэн айлчлалын дүнд Гашуунсухайт-Ганцмод боомтыг төмөр замаар холбох асуудлыг эцэслэн тохиролцоод байна. Үүнийг цаг алдалгүй бодитой ажил хэрэг болгож чадвал Тавантолгойгоос БНХАУ-ын Ганцмод боомт хүртэл төмөр замаар нүүрсээ тээвэрлэх боломжтой болно. Ингэснээр тээврийн зардал буурах, экспортын биет хэмжээ эрс нэмэгдэх, цаашид цар тахал болон гамшигт үзэгдлийн үед нийлүүлэлт тасалдалгүй явагдах зэрэг олон ач холбогдолтой юм.

Тавантолгой-Гашуунсухайтыг холбох төмөр зам өнгөрсөн долоодугаар сард ашиглалтад орох ёстой байсан ч бүтээн байгуулалтын ажил үргэлжилж байна.

Энэ намар Тавантолгой, Зүүнбаян, Гашуунсухайт боомтын төмөр зам ашиглалтад орох хүлээлттэй байна. Мөн Ханги-Мандал боомтыг төмөр замаар холбох асуудлыг БНХАУ-ын тал дотооддоо хэлэлцэхээ мэдэгдээд байгаа юм.

Үүнээс гадна БНХАУ-ын Гадаад хэргийн сайд Ван Игийн Монгол Улсад хийсэн айлчлалаар БНХАУ-ын талд урт хугацаанд нүүрс тогтвортой нийлүүлэх гэрээ байгуулахаар боллоо. Төмөр замууд ашиглалтад орсон ч авто замын тээврийг зогсоохгүй гэж Ерөнхийлөгч У.Хүрэлсүх өмнө нь тодотгож байсан юм.

Нийтэлсэн огноо2022-08-11