Монгол Улс 2030 он гэхэд хүлэмжийн хийн ялгаруулалтаа 22.7 хувиар бууруулах зорилт тавиад байна
Засгийн газрын Ногоон хөгжлийн зорилтууд хэт өөдрөг бөгөөд хэрхэн биелэх нь тодорхой бус хэвээр байгааг НҮБ-ын Хөгжлийн хөтөлбөрийн судалгаа харуулж байна.

Монгол Улсын Засгийн газар 2030 он гэхэд нийт хүлэмжийн хийн ялгаруулалтаа 22.7 хувиар, эрчим хүчний үйлдвэрлэл нийлүүлэлтийн салбарт хүлэмжийн хийн ялгаруулалтаа 50 хувиар бууруулах зорилт тавин ажиллаж байгаа юм.
Цаашид эрчим хүчний зорилтуудаа үндэсний хэмжээнд тодорхойлсон хувь нэмэр, шинэ сэргэлтийн бодлого, “Алсын хараа-2050” баримт бичгүүдтэй уялдуулах хэрэгтэй байгааг тайланд дурдсан байна.

2020-2024 оны үйл ажиллагааны мөрийн хөтөлбөрт нүүрсний цахилгаан станцуудыг шинээр барих зорилт тусгагджээ. Ингэснээр сэргээгдэх эрчим хүчний үйлдвэрлэл, эрчим хүч хэмнэлтийн төлөвлөгөөг хэрэгжүүлсэн ч Монгол Улс үндэсний хэмжээнд тодорхойлсон хувь нэмрээ биелүүлж чадахгүйд хүрэх магадлалтай гэж үзсэн байна.

Одоогоор Монгол Улсын эрчим хүчний үйлдвэрлэлийн 10.2 хувийг сэргээгдэх эрчим хүчний үйлдвэрлэл бүрдүүлж байна. COP27 уулзалтаар улс орнууд сэргээгдэх эрчим хүчийг дэмжих хөрөнгө оруулалтын сан босгохоо зарласан юм.

Төслийн санаануудыг ажил хэрэг болгон хувиргаж, сэргээгдэх эрчим хүчний хэлэлцээрүүдийг зарласнаар Монгол Улс энэ төрлийн боломжийг ашиглах боломжтойг НҮБ-ын Хөгжлийн хөтөлбөр онцолсон байна.

Нийтэлсэн огноо2022-12-01