Биржээр дамжуулан арилжаалагдсаны үр дүнд нүүрсний үнэ дунджаар 10 хувиар өсжээ

Оны эхний сард Уул уурхайн бүтээгдэхүүний биржээр дамжуулан 277.3 тэрбум төгрөгийн үнийн дүнтэй арилжаа хийгдсэн байна. “Дарханы төмөрлөгийн үйлдвэр” ХХК болон “Монголросцветмент” ТӨҮГ нэг сая тонн төмрийн хүдэр болон баяжмалыг 212.1 тэрбумаар амжилттай арилжаасан бол “Эрдэнэс Тавантолгой”, “Энержи Ресурс” ХХК болон “Хангад Эксплорэйшн” нийт 256 мянган тонн нүүрсийг 65.2 тэрбум төгрөгөөр арилжаалжээ.

2024 онд биржээр нийт 8.9 их наяд төгрөгийн уул уурхайн бүтээгдэхүүн арилжаалагдсан нь өмнөх оныхоос 18 хувиар өссөн үзүүлэлт болж байна. Үүний дийлэнх буюу 93 хувийг 22.4 сая тонн нүүрсний арилжаа бүрдүүлж байгаа нь экспортоор гаргасан нүүрсний дөрөвний нэгийг бүрдүүлжээ.

Уул уурхайн биржээр дамжуулж арилжаалагдсаны үр дүнд нүүрсний үнэ дунджаар 10 хувиар өссөн үзүүлэлттэй байна. Өнгөрсөн онд “Эрдэнэс Тавантолгой” ХК 5.3 их наяд төгрөг, “Энержи Ресурс” ХХК 1.9 их наяд төгрөг, “Тавантолгой” ХК 0.9 их наяд төгрөгийн үнийн дүн бүхий нүүрс арилжаалжээ.

Түүнчлэн 2024 онд биржээр зэсийн баяжмал болон хайлуур жоншны арилжааг эхлүүлснээр 10 тэрбум төгрөгийн хайлуур жонш, 40.5 тэрбум төгрөгийн зэсийн баяжмалын хэлцэл баталгаажсан байна.