Засгийн газрын хуралдаанаас гаргасан шийдвэрийг "20 минутын хот" Үндэсний хорооны дарга Р.Эрдэнэбүрэн танилцууллаа.
Тэрээр хэлэхдээ, "Хурлаар гэр хорооллын дахин төлөвлөлт, түгжрэлийг бууруулах тухай хуульд өөрчлөлт оруулах багц хуулийн төслийг ирэх долоо хоногийн лхагва гарагт Засгийн газрын хурлаар хэлэлцүүлж, УИХ-д өргөн барих чиглэл өглөө.
Нэгдүгээрт, төлөвлөлтөө маш сайн хийх ёстой гэж үзсэн. Олон жил яригдсан 2040 он хүртэлх хотын төлөвлөлтийнхөө асуудлыг УИХ-д өргөн барьсан бөгөөд хэлэлцүүлж буй. Хот тосгоны эрхзүйн байдлын тухай хуультай хамтад нь уялдаатай хэлэлцүүлэх үүднээс зургаадугаар сараас хэрэгжиж эхлэх гэж байсан тус хуулийн үйлчлэх хугацааг нэг жилээр хойшлуулж байгаа юм.
Төлөвлөлтүүдээ тал талын уялдаатай хийвэл дараагийн зураг төсөл, хөрөнгө оруулалтууд ярих боломжтой болно гэж бодож байна.
Туулын хурдны замын олон улсын нээлттэй тендерийг 2025 оны зургаадугаар сарын 19-нд нээнэ. Барилгын ажлыг 2025 оны намар гэхэд дуусгах төлөвлөгөөтэй байна. Энэ зундаа бүтээн байгуулалтын томоохон хэсгийг хийж амжих байх.
Туулын хурдны зам, тойрог зам хоёрын бүтээн байгуулалтыг хийснээр нийслэл хотын түгжрэл 50 хүртэлх хувиар буурна гэж тооцоолж байна. Гэсэн хэдий ч түгжрэлийг бууруулах ажлыг ганцхан зун хийж амжихгүй.

Нийтэлсэн огноо2025-05-21