2025 оны долдугаар сарын 9-ний өдрийн 26-р тогтоолоор "Эрдэнэс Тавантолгой" компанид онцгой дэглэм тогтоож, Засгийн газрын онцгой бүрэн эрхт төлөөлөгчийн багийг томилон ажиллуулсан. Энэхүү ажлын үр дүнгийн талаар Эрдэнэс Тавантолгой ХК-ийн БЭТ У.Бямбасүрэн мэдээлэл өглөө.
Тэрээр “Гурван сарын хугацаатай онцгой дэглэмийн хугацаа дуусаж, Засгийн газрын хуралдаанд ажлынхаа үр дүнг танилцууллаа. Олборлолтын хэмжээ 22 сая тоннд хүрсэн. Энэ жилийн борлуулалтын хэмжээ 18.6 сая тонн, экспортын хэмжээ нь 20 сая тонн нүүрс гаргасан байна. Орлогын хэмжээ 1 тэрбум 170 сая долларт хүрсэн. Татварт бид 1.16 их наяд төгрөгийг төлжээ.
Биржийн экспорт 4.4 сая тоннд хүрсэн байна. Онцгой дэглэмийн хугацаанд борлуулалтын хэмжээ эхний хагас жилтэй харьцуулахад сарын дундаж 1.6 дахин, биржийн тээвэр 2 дахин, экспорт 1.3 дахин, орлого 1.3 дахин, олборлолтын хэмжээ 1.2 дахин өссөн амжилтыг гурван сарын хугацаанд үзүүллээ. 
Зургаадугаар сард Гашуунсухайт-Ганцмод боомтоор өдөрт 462 машин гарч байсан бол долдугаар сард 610, наймдугаар сард 752, есдүгээр сард 880 тээврийн хэрэгсэл гарсан. Биржийн борлуулалтыг бид онцгой анхаарсан юм. Уул уурхайн бүтээгдэхүүнээ биржээр гаргах тухай хууль бий.
Монгол Улсын байгалийн баялаг бол ард түмэнд ил тод нээлттэй, хяналлтай, хариуцлагатайгаар үйл явц нь явагдах ёстой. Тиймээс "Эрдэнэс Тавантолгой" компани онцгой дэглэм тогтоосон хугацаанд 120 удаагийн арилжааг Монголын хөрөнгийн биржээр дамжуулан зохион байгуулсан. Үүний 79 нь буюу 3/2 нь амжилттай хийгдсэн байна. 5 сая 939 мянган тонн нүүрсийг бид хөрөнгийн биржээр дамжуулан арилжаалж, арилжааны нийт дүн 343.4 сая доллар болжээ. Биржийн зогссон гэрээнүүд гэж 29 гэрээний асуудал байсан. Өндөр үнэтэй байхад нь нүүрс худалдаж аваад ачилт, худалдан авалтаа Хятадын тал зогсоосон байсан. Энэ гэрээний хэлцлүүдийг хийсний үр дүнд 15 гэрээг нь шийдвэрлэж чадсан” гэлээ.  
BY
С.Золзаяа нь 2022 онд МҮИС-ийг сэтгүүлч мэргэжлээр төгссөн. 2024 оноос iToim.mn сайтад сэтгүүлчээр ажиллаж байна.

Нийтэлсэн огноо2025-10-08