МАН-ын Удирдах зөвлөл өглөө хуралдаж Хууль зүй, дотоод хэргийн сайдаар УИХ-ын гишүүн Г.Тэмүүлэнг томилохыг 100 хувийн саналаар дэмжсэн. Тэгвэл хурлын дараа МАН-ын Ерөнхий нарийн бичгийн дарга Я.Содбаатар сэтгүүлчдийн асуултад хариуллаа.
Тэрээр “Сүүлийн үед хэвлэл мэдээллээр нийгмийг талцуулсан том тоотой хэрэг төвгүүд ярьдаг асуудалдаа цэг тавих ёстой. Намын зүгээс дотоод эв нэгдэл, сонгуулийн бэлтгэл ажлыг хангах талаар ярьж байна. Энэ талаар ч бүлэг дээр ярьж ойлголцсон.
Манай намын бүлэг 38:30 гэсэн тоо байхгүй. Ажлаа өгсөндөө гоморхсон, улстөрчид хоорондын харилцаатай холбоотой гомдсон 10 гаруй хүн байх шиг байна. Энэ хүмүүстэй намын удирдлага, хяналтын шатны байгууллагууд уулзаж ярьж ойлголцох тал руу явж байгаа. Өчигдөр Боловсролын сайд Л.Энх-Амгалан, УИХ-ын гишүүн А.Ариунзаяа, О.Саранчулуун нарыг дуудаж уулзсан. Талцал хуваагдал, фракц бүлэглэл байхгүй гэдгийг маш тодорхой хэлж байгаа. МАН 31-р их хурлаа хийж Н.Учралыг намын даргаараа сонгосон.
Сонгууль ойртож байгаа учраас намын лидрүүдийг бүдгийг нь Ерөнхийлөгчийн сонгуульд нэр дэвших гэж байгаа мэт ярьж байна. Намын эв нэгдлийн эсрэг, бодлогын эсрэг, дүрэмд заасан зөрчил үүсгэвэл намаас хөөнө. Энэ том нам Дүрмийн хүрээнд явж л өдий хүрсэн. Засгийн газрын асуудал орж ирээд эсрэг ярьсан, ямар нэгэн үйлдэл парламентын гишүүн гаргавал намаас хөөнө” гэлээ.

Пүрэвдагва БУЛГАН

Сэтгүүлч М.Булган нь iToim.mn сайтад 2015 оноос ажиллаж байна. Улс төр, нийгмийн чиглэлээр мэдээ, мэдээлэл бэлтгэдэг.

Нийтэлсэн огноо2026-09-17