Өнөөдрийн Засгийн газрын хуралдаанаар “Оюу толгой” ХХК-ийн ТУЗ-ийн гишүүнээс Э.Баясгаланг чөлөөлжээ.
Э.Баясгалан 2020 онд анх томилогдсон. Үүнээс өмнө АНУ-ын Нью-Иорк хотод “Номура Секюритийз Интэрнэшнл” компанийн Хөрөнгө оруулалтын банкинд Дэд ерөнхийлөгчийн албан тушаалыг хашиж байсан. Мөн “Жэй Пи Морган Секюритийз”, “Саусгоби Сэндс,” “Саусгоби Ресурс” зэрэг компаниудад ажиллаж байсан арвин туршлагатай юм.
Чикагогийн Их сургуулийн Бүүт Бизнесийн сургуулийн Бизнесийн удирдлагын магистр, Болгар Улс дахь Америкийн Их сургуулийн Бизнесийн удирдлагын бакалавр зэрэгтэй.
“Оюу толгой” ХХК-ийн ТУЗ есөн гишүүнтэй ба гурав нь Монголын Засгийн газрыг төлөөлдөг. Зөвхөн саналын эрхтэй, аливаа шийдвэрт нөлөөлөх боломж олддоггүй. Том зургаар хөрөнгө оруулагч тал ТУЗ дээр олонхоор хүч түрж алив асуудал шийддэг нь ужгирсаар байгаа юм.
Э.Баясгалангийн хувьд энэ хандлагад шинэчлэл хийхээр зорьж, Монголын эрх ашгийг Оюу толгой төсөлд хангуулахаар ажиллаж байв.
Саяхан “Оюу толгой” ХХК-ийн ТУЗ-ийн дарга Шон Хинтон нь “Эрдэнэс Оюу толгой” ХХК-д албан бичиг явуулахдаа,
“Э.Баясгалан Тэнгэр ТВ-д ярилцлага өгөхдөө компанийн нууц мэдээлэл задалсан. Нууц хадгалах үүргээ удаа дараа зөрчиж байна. Энэ асуудлаар тодорхой шийдэл гаргаж өгнө үү” гэсэн агуулгаар ханджээ.
Энэ бол зургадугаар сард ЗГХЭГ-ын дарга Н.Учрал нарт хувь нь очсон бичиг.
Эдгээр нь Э.Баясгаланг чөлөөлөх сонирхол хөрөнгө оруулагч талд байсан, энэ дагуу өнөөдөр Засгийн газар дээр шийдвэр гарсан гэж ойлгогдож байна.
М.ТЭНГИС

Нийтэлсэн огноо2025-10-08