УИХ-ын өнөөдрийн /2025.11.07/ чуулганы үдээс өмнөх хуралдаанаар “Хянан шалгах түр хороо байгуулах тухай” Улсын Их Хурлын тогтоолын төсөл /Улсын Их Хурлын гишүүн Л.Оюун-Эрдэнэ нарын 33 гишүүн 2025.10.06-ны өдөр өргөн мэдүүлсэн/-ийг хэлэлцлээ.
УИХ-ын гишүүд асуултат хариулт авч дууссаны дараа УИХ-ын гишүүн Х.Тэмүүжин үг хэлэв. Тэрбээр, "Парламентын хяналтын түр хороог олонх нь байгуулах гэж байхад унагах юм бол парламентат ёс байхгүй болно гэсэн үг. Түр хороог нь зүгээр л байгуулж өгөх ёстой" гэдгийг сануулав.
Чингээд санал хураалт явуулахад 92 гишүүнээс 46 нь зөвшөөрч, 46 нь татгалзаж санал тэнцлээ. 50 хувиар санал дэмжигдээгүйд тооцогдов.
Санал хураалтын үр дүнд техникийн саатал гарсан "Дэмжсэн санал дэмжээгүй гэж гарлаа" гэх маргаан гарсан юм.
Тухайлбал, УИХ-ын гишүүн О.Алтангэрэл: "Яахаараа миний дэмжсэн гэдэг санал татгалзсан гэж төхөөрөмж дээр бүртгээд байгаа юм бэ. Мөн Х.Баасанжаргал гишүүнийх" хэмээлээ.
Ингээд "Ухаа худаг"-ийн тусгай зөвшөөрлийг шалгах Түр хороо байгуулах Л.Оюун-Эрдэнэ нарын 33 гишүүний өргөн мэдүүлсэн санал унасныг техникийн саатал гэж, ирэх долоо хоногийн чуулган руу хойшлууллаа.

Нийтэлсэн огноо2025-11-07