Евразийн эдийн засгийн холбоо (ЕАЭЗХ) ба Монгол Улсын хооронд байгуулсан чөлөөт худалдааны түр хэлэлцээрийн хууль эрхзүйн процедур 2026 оны дунд үеэс хэтрэхгүй дуусна гэж найдаж байгаа тухайгаа ОХУ-ын Шадар сайд Алексей Оверчук мэдэгдлээ.
“Одоогоор ЕАЭЗХ-ны орнуудад уг хэлэлцээрийг соёрхон батлах явц үргэлжилж байна. Эдгээр процедур нь ирэх жилийн дунд үеэс өмнө дуусна гэж бид хүлээж байна. ОХУ-д хэлэлцээрийг соёрхон батлуулах баримт бичгийн багцыг Төрийн Думд аль хэдийн өргөн барьсан” гэж тэрээр Иркутскийн Монгол, Оросын бүс нутгуудын анхны форумын үеэр хэлэв.
Талууд энэ хэлэлцээр дээр 2021 оноос хойш ажиллаж ирсэн гэж Оверчук дурджээ. 2025 оны зургаадугаар сард Минск хотноо ЕАЭЗХ ба Монголын хооронд худалдааны түр хэлэлцээрт гарын үсэг зурсан бөгөөд энэ үеэр Оверчук “экспортын сонирхлын бараа, бүтээгдэхүүнийг гаалийн татваргүйгээр импортлох боломжийг нээж байна” хэмээн Монголын төлөөлөгчдөд хандан хэлж байв.
ОХУ тус хэлэлцээрийг хүчин төгөлдөр болгох журмыг шуурхай дуусгахыг хүлээж байгааг Ерөнхий сайд Михаил Мишустин наймдугаар сард хэлж байсан. Хэлэлцээр хүчин төгөлдөр болохын тулд соёрхон батлах журамд орох ёстой.
Монголтой байгуулсан энэхүү хэлэлцээр нь түр хугацааны шинжтэй бөгөөд анх гурван жилийн хугацаатайгаар байгуулсан бөгөөд цаашид сунгах боломжтой юм.
Эх сурвалж: https://interfax.com/newsroom/top-stories/115081/
By
Х.Бямбажаргал нь МУИС-ийг Олон улсын харилцаа мэргэжлээр төгссөн бөгөөд 2024 оноос iToim.mn сайтад сэтгүүлч, орчуулагчаар ажиллаж байна.

Нийтэлсэн огноо2025-12-02