Нийслэлийн 172 мянган айл өрх 425 цэгээр дамжуулан хагас коксон түлшийг ахуйн хэрэглээндээ хэрэглэж байна. Тухайлбал, энэ сарын 01-ний өдрөөс эхлэн сайжруулсан шахмал түлш нийлүүлэхгүй, хагас коксон түлшийг нийлүүлж байгаа юм. Ингэснээр айл өрхүүд хагас коксон түлшийг 100 хувь хэрэглэх шаардлага үүссэн. Сүүлийн өдрүүдэд Улаанбаатар хотын агаарын бохирдол өмнөх жилтэй харьцуулахад буурсан талаар яригдаж байна.  Энэ талаар Нийслэлийн Засаг даргын орлогч А.Амартүвшинээс тодрууллаа.
Тэрбээр "Сүүлийн гурван жилд агаарын бохирдол харьцангуй буурч байгаа нь олон улс дахь байгууллагын судалгаанаас харагдах болсон. Тухайлбал, 2025 оны арванхоёрдугаар сарын 17-ны өдрийн байдлаар хүхрийн давхар исэл 63.9 хувь, азот 13.6 хувь, PM10 тоосонцор 17.5 хувь, PM2.5 тоосонцор 20.6 хувь, нүүрстөрөгчийн дутуу исэл 18.1 хувиар тус тус буурсан байна. Нийслэлд шөнөдөө -30 хэм давж байгаа энэ үед агаарын бохирдлын хэм хэмжээ нэмэх эрсдэлтэй ч хагас коксон түлшийг хэрэглэснээр PM10, Азот, PM2.5 буурсан нь агаар дахь исэлтээс харагдаж байна.
Энэ сарын 1-ний өдрөөс сайжруулсан шахмал түлшийг хэрэглээнээс халж, хагас коксон түлшийг нийслэлийн хэмжээнд бүрэн хэрэглэж байгаатай холбож тайлбарлаж болно. Олон улс дахь агаарын чанарын индексийн танилцуулгаас дурдвал, Улаанбаатар хот дэлхийд агаарын бохирдлоороо 38-т жагсаж байна. Өмнө нь 1, 2 дугаар байрт эрэмбэлэгдэж ирсэн ч 38 руу буурлаа.
Дархан-Уул аймаг агаарын бохирдлын түвшингээрээ нийслэлээс өндөр үзүүлэлттэй гарах болсон. Өнөөдрийн байдлаар Дархан-Уул аймгийн агаарын бохирдол 177, нийслэлд 138 гэж зааж байна.
Дархан-Уул аймгийн хувьд хүн амын төвлөрөл, гэр хорооллоороо нийслэлээс бага ч агаарын бохирдлын түвшингээрээ улсдаа нэгдүгээрт эрэмбэлэгдэж байна. Нийслэлийн төвийн зургаан дүүрэгт хагас коксон түлш борлуулж буй 425 цэг гэр хорооллын өрхийн түлшний хэрэглээг хангаж байна. Мөн 415 цэг хоногт 2000-2500 тонн түлшний илүүтэй хонож ба нэг цэг өдөрт 2200-2600 тонн түлш борлуулсаар байгаа" гэв.

Нийтэлсэн огноо2025-12-17