Монгол Улсын нийгэм, эдийн засгийн 2025 оны урьдчилсан гүйцэтгэлийг Үндэсний статистикийн хорооноос танилцууллаа.
Улсын нэгдсэн төсвийн орлого, тусламжийн хэмжээ 2025 оны урьдчилсан гүйцэтгэлээр 32.6 их наяд төгрөгт хүрч, өмнөх оныхоос 3.8 хувь буюу 1.2 их наяд, тэнцвэржүүлсэн орлого тусламжийн хэмжээ 30.1 их наяд төгрөгт хүрч, өмнөх оныхоос 1.3 хувь буюу 386.8 тэрбум төгрөгөөр нэмэгджээ.
Харин зарлага, эргэж төлөх цэвэр зээлийн хэмжээ өнгөрсөн онд 31.3 их наяд төгрөг болж, тэнцвэржүүлсэн тэнцэл 1.2 их наяд төгрөгийн алдагдалтай гарсныг Үндэсний статистикийн хорооноос мэдээллээ. 
Татварын нийт орлого 2025 онд 27.1 их наяд төгрөг болж, өмнөх оныхоос 1.2 хувь буюу 331.5 тэрбум төгрөгөөр багасахад орлогын албан татварын орлого 431.5 тэрбум, ашигт малтмалын нөөц ашигласны төлбөр 1.2 их наяд төгрөгөөр багассан нь нөлөөлжээ. Харин нийгмийн даатгалын орлого 892.3 (18.9%) тэрбум төгрөг, нэмэгдсэн өртгийн албан татвар 357.6 (6.1%) тэрбум төгрөг, хөрөнгийн албан татвар 148.3 (32.3%) тэрбум төгрөг, гадаад үйл ажиллагааны орлого 57.0 (3.2%) тэрбум төгрөгөөр тус тус өсжээ. Нийгмийн даатгалын сангийн нийт орлого 2025 онд 6.7 их наяд төгрөгт хүрч, өмнөх оноос 1.1 их наяд төгрөг, нийт зарлага 5.8 их наяд төгрөг болж, 742.1 тэрбум төгрөгөөр тус тус өссөн байна. Харин эрүүл мэндийн даатгалын сангийн орлого 2025 онд 2.3 их наяд төгрөгт хүрч, өмнөх оноос 377.8 тэрбум төгрөгөөр, нийт зарлага 2.2 их наяд төгрөг болж, 311.4 тэрбум төгрөгөөр тус тус өссөн байна.
Нийт зардал өсөхөд урсгал шилжүүлгийн зардал өмнөх оноос 366.0  тэрбум төгрөгөөр өссөн нь голлон нөлөөлжээ.

Нийтэлсэн огноо2026-01-19