Төсвийн тогтвортой байдлын зөвлөлөөс макро эдийн засгийн үндсэн үзүүлэлт, төлөв байдлын таамаглалыг танилцууллаа.  

Төсвийн тогтвортой байдлын зөвлөлийн гишүүн Н.Ууганбаатар "Өнгөрсөн жилийн мөн үед манай эдийн засгийн ерөнхий динамик нэг чигийг зааж байсан. Энэ жил нэмэгдэж байгаа шинэ зүйл нь дотоодын бодлогын тодорхой бус байдал гэх гуравдагч хүчин зүйл гарч ирсэн. Энэ нь Татварын багц хуулийн өөрчлөлттэй холбоотой. Энэ бол нөлөөлөл нь өндөр хууль байгаа. Тиймээс бид энэ жил хоёр өөр төлөв байдал, төсөөлөл хийсэн. 

Эхлээд бид уул уурхайн экспортын төсөөлөл хийдэг. Үүнд нүүрс, зэс, алт, төмрийн хүдэр  гэх дөрвөн бүтээгдэхүүн авч үздэг. Үнэ болон биет хэмжээг төсөөлж гаргадаг. Ингэхэд, нүүрсний биет хэмжээ болон алтны үнэ өсөлттэй байгаа. Төмрийн хүдэр харьцангүй тогтвортой, нүүрсний үнэ нэг их буурахааргүй харагдаж байгаа. Нэг өгүүлбэрээр дүгнэж хэлэхэд, алт, зэс зэрэг бүтээгдэхүүний үнийн өсөлт сайн харагдаж байна. Тэгэхээр экспорт талдаа Монголын эдийн засгийн ирэх жилүүдийн ерөнхий төлөв гайгүй байхаар ажиглагдаж байна.

Зэсийн баяжмалын үнэ дэлхийн зах зээл дээр өсөлттэй байгаа. Гэхдээ энэ өсөлт энэ жил үргэлжлээд ирэх оноос саарах төлөвтэй. Алтны үнэ сүүлийн хоёр жил огцом өсөж байгаа. 2026 онд өснө, 2027 онд өсөлт саарах болов уу гэсэн таамаг гарсан" гэв. 

Нийтэлсэн огноо2026-03-13