УИХ-ын Төсвийн байнгын хорооны өнөөдрийн хуралдаанаар “Туулын хурдны зам” төслийн эдийн засгийн үр ашиг, техник эдийн засгийн үндэслэл (ТЭЗҮ), төсөвт өртөг, санхүүжилтийн эх үүсвэр, төсөвт үзүүлэх нөлөөлөл, мөн гүйцэтгэгчийн сонгон шалгаруулалттай холбогдох мэдээлэл сонслоо.
Нийслэлийн Засаг дарга Х.Нямбаатар Туулын хурдны замын бүтээн байгуулалттай холбоотой мэдээллийг өгч гишүүдийн асуултад хариуллаа.
2013 онд Засгийн газрын хурдны зам барих 307 дугаар тогтоолоор албажиж 4 эгнээ 34.64 км далан, 1.36 км гүүр, 36 км гүүрний ТЭЗҮ-ийг хийжээ. Нийт УИХ-ын 4, Засгийн газрын 5 тогтоолоор Туулын хурдны зам төслийг баталжээ. 2014 онд нарийвчилсан зураг төсвийг баталж 7 орц гарцтай замыг баталж байсан гэдгийг нийслэлийн удирдлагаас өглөө.
2025 онд ТЭЗҮ-ийг шинэчлэн, батлуулж, байгаль орчны нарийвчилсан нөлөөллийг мөн шинэчлэн хийлгэсэн.ТЭЗҮ-ийг шинэчлэхдээ гүүрийг 1,2 км байсныг 9.9 км, замыг зургаан эгнээ болгож нэмэгдүүлж олон улсын нээлттэй тендер зарлажээ. Одоогоор 400 тэрбум төгрөгийн урьдчилгааг гүйцэтгэгч компаниудад өгчээ. Замын эрчмийн судалгааг хийхэд олон зам, уулзварын ачааллыг 34 хувиар бууруулна гэсэн тооцоо гаргажээ. Тойрог замуудтайгаа нийлбэл 50 хувиар бууруулна гэсэн тооцоог хийжээ.
НЗД-ын орлогч Т.Даваадалай "Барилгын ажлын үед байгаль орчинд үзүүлэх нөлөө дунд, бусад үед буюу ашиглалтад орсны дараа  бага гэсэн байгаль орчны үнэлгээг Байгаль орчны яамны дэргэдэх мэргэжлийн хүмүүсээс бүрдсэн зөвлөл  гарсан. Иймд бид замын ажлыг эхлүүлсэн.  
Тойрог 1 болон 2-р зам мөн зургаан эгнээ байна. Одоо нийслэлд 800 мянган машин бий. Цаашид энэ тоо өснө. ETC буюу жолоочоос төлбөрийг урьдчилаад авах боломжтой. Давхардсан тоогоор 200 мянган машин Туулын хурдны замаар зорчино.    
Энэ онд  нийслэлийн төсвөөс 800, ирэх онд мөн 800 тэрбум төгрөгийг энэ төсөлд зарцуулна. Учир нь 2027 оноос нийслэлд сургууль цэцэрлэг барих шаардлагагүй болно, том төслүүдээ санхүүжүүлэх боломж нээгдэнэ. Мөн бид бондын эргэн төлөлтөө тооцоолсон" гэлээ.
Х.Нямбаатар: Энэ төслийг гурван шатны шүүх л зогсооно. Гаднын байгууллагатай гэрээ хийсэн тул гэрээг цуцалбал хот маш их алдагдал хүлээнэ. Ард нийтийн санал асуулгыг энэ төслийн талаар явуулах хуулийн боломж байхгүй. И-Монголиагаар дамжуулж санал авч болно.    
Энэ төслийг зогсоосон хүмүүс л хариуцлага хүлээнэ. Бидний тооцоолж байгаагаар 2027 оны долдугаар сарын 1-нд зөвхөн зорчих хэсэг нээгдэнэ.

Пүрэвдагва БУЛГАН

Сэтгүүлч М.Булган нь iToim.mn сайтад 2015 оноос ажиллаж байна. Улс төр, нийгмийн чиглэлээр мэдээ, мэдээлэл бэлтгэдэг.

Нийтэлсэн огноо2026-04-01