Монголын эдийн засаг өнгөрсөн онд 6.8 хувьтай байсан бол энэ онд 5 хувь, дунд хугацаандаа 5.5 хувьтай байх төсөөллийг Дэлхийн банкнаас гаргажээ. Геополитикийн савлагаатай нөхцөл байдал болон уул уурхайн, хөдөө аж ахуйн салбарын өсөлт саарах төсөөлөл дээр үндэслэн уг таамгыг гаргасан байна.
Тус банкны тайланд дурдсанаар өнгөрсөн онд эдийн засаг өсөхөд гол нөлөө үзүүлсэн уул уурхайн салбарын өсөлт энэ онд дахин давтагдахгүй. Хөдөө аж ахуйн салбарын сэргэлт үргэлжлэх ч өнгөрсөн оныхтой ижил түвшинд хүрэхгүй. Мөн дэлхийн геополитикийн нөхцөл байдал цаг тутам өөрчлөгдөж байгаа энэ үед Монголын эдийн засаг харьцангуй тогтвортой байна. Энэ онд барилгын салбар эрчимжиж, тодорхой бүтээн байгуулалт хийнэ. Худалдаа үйлчилгээний салбар өмнөх онцтой харьцуулахад дараагийн жилүүдэд өсөж эдийн засагт эерэг нөлөө үзүүлэх төсөөлөлтэй байна. Үүний нөлөөгөөр эдийн засаг өсөж, ирэх онуудад 5.5 хувьд хүрч магадгүй гэж үзжээ.
Монгол Улс дэлхий дахинд өрнөж буй савлагаанд тэсвэртэй байгаа нь  үнэ тогтворжуулах гэрээ хийсэнтэй холбоотой. Дайн удаан үргэлжилвэл эрсдэл нэмэгдэнэ. Энэхүү нөхцөл байдлыг үндэслэн инфляц 8.5 хувьтай байх төсөөллийг Дэлхийн банк гаргаад байна. Импорт тогтвортой өсөж, экспорт саарах төлөвтэй байгаа учраас гадаад худалдааны тэнцлийн дарамт нэмэгдэнэ гэдгийг тайландаа дурдлаа.
 
Рэгзэдмаа ЭРДЭНЭЧИМЭГ

Р.Эрдэнэчимэг нь 2022 онд Их засаг их сургуулийг сэтгүүлч мэргэжлээр төгссөн бөгөөд 2026 оноос iToim.mn сайтад ажиллаж байна.

Нийтэлсэн огноо2026-04-09