Шархад дэд төвд эхний ээлжийн 110 айлын ногоон орон сууцыг ашиглалтад орууллаа.

“Улаанбаатар хотын ногоон орон сууц” төслийн хүрээнд барьсан барилгуудыг бусад стандарт барилгатай харьцуулахад амьдарч буй иргэнд эрчим хүчний хэмнэлт 25, усны хэмнэлт 20-25, барилгын материалд шингэсэн эрчим хүчний хэмнэлт 20-25 хувьтай гэж үнэлжээ.

Нээлтийн үеэр нийслэлийн Засаг дарга бөгөөд Улаанбаатар хотын захирагч Б.Пүрэвдагва “Нэг төвт хотоос олон төвт хот руу шилжих, төвлөрлийг сааруулах, түгжрэлийг бууруулах зорилгоор нийслэлийн Баянхошуу, Шархад дэд төвд Азийн хөгжлийн банк, Уур амьсгалын ногоон сангийн санхүүжилтээр “Улаанбаатар хотын ногоон орон сууц төсөл”-ийг хэрэгжүүлж байна. Төслийн хүрээнд Шархад дэд төвд нийт 338 айлын ногоон орон сууц барьж байгаа. Өнөөдөр эхний ээлжийн 110 айлын орон сууцыг ашиглалтад оруулж, оршин суугчдаа хүлээн авахад бэлэн боллоо. Улаанбаатар хотын ногоон орон сууц нь дэлхийн 150 гаруй улсад хүлээн зөвшөөрөгдсөн ногоон барилгын сертификат болох EDGE гэрчилгээг хүлээн авсан. Өөрөөр хэлбэл, байгаль орчин болон хүнд ээлтэй барилгын материал ашиглаж, ус, эрчим хүчний хэмнэлттэйгээр барьсан нь амьдарч буй хүмүүстээ ээлтэй. Цаашид бид хувийн хэвшилтэй хамтран 4200 айлын ногоон орон сууцны төслийг эхлүүлнэ. Төслийн үр дүнд 8000 өрхийн яндан, 5000 өрхийн нүхэн жорлонг бууруулж, жилд 2.4 сая кВт.ц эрчим хүч, 5.5 сая литр усыг хэмнэж, иргэдийн амьдрах орчныг сайжруулна” хэмээн ярилаа.

“Улаанбаатар хотын ногоон орон сууц” төслийн хүрээнд нийт 4200 айлын ногоон орон сууцыг 120 мянган ам метр ногоон байгууламж, 16.4 км дугуйн зам, 39.2 км явган хүний зам, 3800 авто машины зогсоолын хамт цогцоор нь барихаар төлөвлөж байгаа аж. Ногоон орон сууцны 10 хувийг тусгай хэрэгцээт иргэдэд зориулсан байна. Энэ нь тусгай хэрэгцээт иргэнд хүртээмжтэй орчныг бий болгосон хамгийн том орон сууцны төсөл юм. Орц, гарц чөлөөтэй, дотоод зохион байгуулалт нь тусгай хэрэгцээт иргэнд хүртээмжтэйгээр төлөвлөсөн аж. 

Нийтэлсэн огноо2026-08-21