Гадаадын иргэнд виз болон визийн зөвшөөрөл олгохтой холбогдуулан тухайн иргэний Монгол Улсад байрлах хаягийг нотлох баримтыг дараах хэлбэрээр бүрдүүлж холбогдох байгууллагад ирүүлэхийг албаны эх сурвалж анхаарууллаа. Үүнд:
Зочид буудал, амралт, кемп, дэн буудалд байрлах бол захиалгын баталгаажуулалтын хуудас болон төлбөр төлсөн баримт;
Хувь иргэн байрлах орон байраар хангаж буй тохиолдолд хаягийн баталгаажуулалтын захидал, иргэний үнэмлэхийн хуулбар /гадаадын иргэний паспортын хуулбар/, мөн тухайн хаягийн нотлох баримт бичиг (үл хөдлөх хөрөнгийн гэрчилгээ, түрээсийн гэрээ гэх мэт);
Аялал жуулчлалын байгууллагаар дамжин ирж буй тохиолдолд аяллын маршрут, буудаллах болон отоглох цэгийн хаяг, байршлын мэдээллийг албан бичгээр;
Хөдөө орон нутагт ажиллах гадаадын иргэдийн хувьд уригч байгууллага байрлах газрын дэлгэрэнгүй мэдээлэл (ажилчдын байр, кемпийн байршил, гэр, контейнерын дугаар гэх мэт)-ийг албан бичгээр тусган ирүүлэх.
Хэрэв дээрх шаардлагыг хангаагүй хүсэлт ирүүлсэн, эсвэл хуурамч хаягийн бүртгэл ашигласан тохиолдолд виз, визийн зөвшөөрлийг олгохоос татгалзах, цуцлах аж.

Нийтэлсэн огноо2025-07-25