Төр, хувийн хэвшлийн түншлэлийн хүрээнд Монгол Улсад анх удаа үйлдвэрийн цэвэрлэсэн хаягдал усыг дахин ашиглах бодит шийдэл хэрэгжиж эхэлснийг БОУАӨЯ мэдээлэв.
Тус яамны санаачилга, хүсэлтийн дагуу Дэлхийн банкны 2030 Усны нөөцийн бүлэг нь 2020–2024 онд БНСУ-ын Ногоон хөгжлийн итгэлцлийн сангийн санхүүжилтээр судалгаа хийж, М-Си-Эс Кока-Кола ХХК-ийн үйлдвэрийн цэвэрлэсэн хаягдал усыг Амгалан дулааны станц ТӨХК-ийн технологийн хэрэгцээнд ашиглах нь техник, байгаль орчны хувьд боломжтойг баталгаажуулж судалжээ. Ингэснээр М-Си-Эс Кока-Кола ХХК 3.5 тэрбум төгрөгийн хөрөнгө оруулалтаараа хоёр байгууламжийн хооронд 2.5 км урт шугам хоолой, нэмэлт тоног төхөөрөмжийг суурилуулж, Амгалан дулааны станц ТӨХК-д албан ёсоор хүлээлгэн өглөө.
БОУАӨЯ-ны Төрийн нарийн бичгийн дарга Ш.Батбаяр манай улсад хаягдал усыг дахин ашиглах шийдлийг бодит ажил болгож, байгаль, орчныг хамгаалахад төр хувийн хэвшлийн хамтарсан анхны жишиг төслийг хэрэгжүүлсэн Амгалан дулааны станц, М-Си-Эс Кока-Кола компанийн хамт олон, удирдлагууд, төсөл хэрэгжүүлэх боломжоор хангасан Дэлхийн банкинд талархал илэрхийлэв.
Төслийн үр дүнд Амгалан дулааны станцын усны хэрэглээний 40 хувийг хангах, хоногт 500 м³, жилд 120,000 м³ гүний усыг хэмнэх боломжтой болж байна. Ингэснээр гүний усны нөөцийг хэмнэж, бохирдлыг болон усны хэрэглээний зардлыг багасган, байгальд ээлтэй технологийг нэвтрүүлээд байна.

Нийтэлсэн огноо2025-12-19