Өнөөдрөөс энэ сарын 11 хүртэл ихэнх нутгаар дулаарах аж. Иймд цас ихтэй газруудад шар усны үер буух эрсдэлтэй байгааг цаг уурын байгууллагаас анхаарууллаа. Цас их орсон буюу Баян-Өлгий, Дархан-Уул, Сэлэнгэ аймгуудын нутгаар шар усны үерийн аюул маш их эрсдэлтэй байгаа юм.

Ирэх тав хоногт агаарын температур шөнөдөө Увс нуурын хотгор, Тэс голын хөндийгөөр -27...-32 градус, Дархадын хотгор, Хөвсгөл, Хэнтийн уулархаг нутаг, Завхан голын эх, Тэрэлж голын хөндийгөөр -22...-27 градус, Алтайн уулархаг нутаг, Идэр, Туул, Хэрлэн, Онон, Улз, Халх голын хөндий, Дорнод-Монголын тал нутгаар -17...-22 градус, говийн бүс нутгийн баруун өмнөд хэсгээр -1...-6 градус,  Хангайн нурууны өвөр бэл, говийн бүс нутгийн хойд болон зүүн хэсгээр -6...-11 градус,  бусад нутгаар -11...-16 градус хүйтэн,

Өдөртөө Тэс голын хөндийгөөр -12...-17 градус, Увс нуур болон Дархадын хотгороор -7...-12 градус, Хөвсгөл, Хэнтийн уулархаг нутаг, Завхан, Заг-Байдраг голын эх, Идэр, Ерөө, Хараа, Хэрлэн, Онон, Улз, Халх голын хөндийгөөр -1...-6 градус хүйтэн, говийн бүс нутгийн өмнөд хэсгээр +9...+14 градус, Хангайн нурууны өвөр бэл, говийн бүс нутгийн хойд хэсгээр +5...+10 градус, бусад нутгаар 0...+5 градус дулаан байх урьдчилсан мэдээ гарчээ.

Б.АЗЖАРГАЛ

Нийтэлсэн огноо2026-03-09