МЭК судалгааны байгууллага 2026 оны долдугаар сарын улс төрийн барометрийн үр дүнг танилцууллаа. Судалгаанд Улаанбаатар хот болон орон нутагт оршин суудаг сонгуулийн насны 904 иргэнийг хамруулсан бөгөөд долдугаар сарын 15-21-ний өдрүүдэд квот бүхий санамсаргүй түүврийн аргаар утсаар холбогдон авчээ. Судалгааг авсан хугацаа өргөн хэрэглээний бараа бүтээгдэхүүний үнэ өссөн, шатахууны хомсдол үүссэн үетэй давхцаж байгаа юм.
Судалгаанд оролцогчдоос Ерөнхийлөгч, УИХ, Ерөнхий сайд, Нийслэлийн Засаг даргын үйл ажиллагаанд хэр сэтгэл ханамжтай байгааг асуужээ. Үр дүнгээс харахад, дээрх дөрвөн байгууллага, албан тушаалтны үйл ажиллагаанд өгсөн үнэлгээ өмнөх сарынхаас өссөн байна.
Ерөнхийлөгчийн үйл ажиллагаатай холбоотой эерэг сэтгэгдлүүдийн дунд "гадаад харилцаа сайжирсан", "иргэдтэй уулзах болсон" гэсэн хариултууд түгээмэл байсан бол сөрөг тал нь "үнийн өсөлтийн асуудал шийдэгдэхгүй байна", "Ерөнхийлөгчийн шийдвэр хэрэгждэггүй" гэсэн хариултууд хамгийн олон давтагджээ. Нийслэлийн Засаг даргын хувьд "залуу, шинэ хүн, учраа олохыг хичээж байгаа" гэсэн эерэг үнэлгээ өгсөн иргэд байсан бол "Засаг дарга солигдоод ч нийслэлд ямар ч өөрчлөлт гараагүй, туршлагагүй" гэсэн сөрөг сэтгэгдэл хамгийн олон ирсэн байна.

Судалгааны хамгийн сонирхол татсан хэсэг нь үйл ажиллагаа нь таалагддаг ба таалагддаггүй улстөрчдийн рейтингийн жагсаалт юм. Энэ нь улстөрчдийн эерэг рейтинг болон сөрөг анти-рейтинг үнэлгээгээр эрэмбэлсэн жагсаалт бөгөөд үр дүнгээс харахад:
"Үйл ажиллагаа нь таалагддаг" жагсаалтыг Ерөнхийлөгч У.Хүрэлсүх тэргүүлж, судалгаанд оролцогчдын 29 хувь нь түүний үйл ажиллагаа таалагддаг гэж хариулжээ.
"Үйл ажиллагаа нь таалагддаггүй" жагсаалтыг Ерөнхий сайд Н.Учрал тэргүүлсэн байна. Судалгаанд оролцогчдын 16 хувь нь дэмждэг буюу үйл ажиллагаа нь таалагддаг гэсэн бол 17 хувь нь эсрэгээрээ таалагддаггүй гэж хариулжээ.
Ерөнхий сайд Н.Учралтай холбоотой сөрөг сэтгэгдлүүдийн дунд "шийдвэрүүд нь хэрэгждэггүй", "Засгийн газрын гишүүд нь ажлаа хийж чаддаггүй" гэсэн хариултууд хамгийн олон давтагджээ.

Сандэлгэр ЗОЛЗАЯА

С.Золзаяа нь 2022 онд МҮИС-ийг сэтгүүлч мэргэжлээр төгссөн. 2024 оноос iToim.mn сайтад сэтгүүлчээр ажиллаж байна.

Нийтэлсэн огноо2026-07-30