Монгол Улсын Засгийн газар болон олон улсын санхүүгийн байгууллагуудын хамтын ажиллагааг шинэ шатанд гаргах, мөн  СОР17-гийн хүрээнд дэвшүүлж буй “Тал хээрийн төлөвлөгөө”-ний зорилтыг хэрэгжүүлэх, хөрөнгө оруулалт татах хоёр чухал алхмыг эхлүүллээ.

Үүнд:

1. Монгол Улсын Засгийн газар, Европын Хөрөнгө оруулалтын банк хооронд 200 хүртэлх сая еврогийн санхүүжилтийн “Эрмэлзлийн бичиг” байгууллаа. Ингэснээр техник, мэргэжлийн дэмжлэгт 20 сая еврогийн буцалтгүй тусламж, 100 хүртэл сая еврог Европын хөрөнгө оруулалтын банкны нэн хөнгөлөлттэй зээлийг гаргаж, бусад эх үүсвэрээс нэмэлт хөрөнгө татахаар ажиллаж байна. Энэ хөрөнгө оруулалт ой модоо хамгаалах, доройтсон газраа нөхөн сэргээхээс гадна орон нутагт бизнес хөгжүүлэх, ажлын байр нэмэх, иргэдийн амжиргааг дээшлүүлэхэд чиглэгдэнэ.

2. Монгол Улсын Засгийн газар болон Дэлхийн банк групп хоорондын “Тогтвортой эдийн засаг ба газрын эдийн засаг менежмент”-ийн (SMILE) хөтөлбөр хэрэгжүүлэхээр гарын үсэг зурлаа.  Энэ хүрээнд 100 сая ам.долларын холимог санхүүжилт бүрдүүлж, газар нутгаа зөв зохистой ашиглах байгалиа хамгаалах, орон нутгийн эдийн засгийг хөгжлийг хамтат нь дэмжихэд чиглэнэ.

Монгол Улс СОР17-г зохион байгуулагч орны хувьд “Тал хээрийн төлөвлөгөө”-г дэвшүүлж буй бөгөөд энэ хүрээнд бэлчээрийн тогтвортой менежмент, ус ба газрын нэгдсэн менежмент, байгальд суурилсан шийдэл бүхий тогтвортой дэд бүтэц гэсэн гурван чиглэлээр санаачилга гаргаж байна. Эдгээр санаачилгын зорилго нь шинжлэх ухаанд суурилсан бодлого, бодит шийдлийг хэрэгжүүлэх, хөрөнгө оруулалт татах, төслийн багцыг хэрэгжүүлэхэд орших юм. Европын хөрөнгө оруулалтын банк, Дэлхийн банк групп нь Монгол Улстай энэ зорилгын хүрээнд хамтран ажиллахаар төлөвлөж буй нь энэ юм.

Тухайлбал, Дэлхийн банк групптэй хамтран хэрэгжүүлэх “SMILE” хөтөлбөр нь газрын доройтлыг бууруулах, байгалийн нөөцийг хамгаалах, нөхөн сэргээх, байгальд суурилсан шийдлийг хөгжүүлэхийн зэрэгцээ хувийн хэвшлийн хөрөнгө оруулалт, ногоон өртгийн сүлжээ, тогтвортой ажлын байрыг дэмжих урт хугацааны цогц үйл ажиллагаа юм. Тус хөтөлбөр нь “Тал хээрийн төлөвлөгөө”-ний зорилтуудтай уялдаж, бодлого болон олон улсын үүрэг амлалтуудыг бодитоор хэрэгжүүлэхэд чухал хувь нэмэр оруулах бүрэн боломжтой.

Мөн Монгол Улсын Засгийн газрын “Чөлөөлье” санаачилгын хүрээнд дэвшүүлж буй ногоон хөрөнгө оруулалт, санхүүжилтийг нэмэх, уур амьсгалын өөрчлөлтөд тэсвэртэй дэд бүтцийг хөгжүүлэх зорилттой нийцэж байгаагаараа онцлогтой. Өнөөдөр эхлүүлсэн энэ хамтын ажиллагаа нь Монгол Улс болон олон улсын санхүүгийн байгууллагын түншлэлийг бэхжүүлж, тогтвортой хөгжил, байгаль орчин хамгаалал, уур амьсгалын өөрчлөлтөд тэсвэртэй байдлыг дэмжих чухал алхам болох юм.

Нийтэлсэн огноо2026-08-24