Монгол Улсын Шадар сайд Т.Доржханд АНЭУ-ын Эрчим хүч, дэд бүтцийн яамны сайд Сухайл бин Мухаммад Аль-Мазруитай уулзаж, Монгол Улсын ЭХЯ, АНЭУ-ын Эрчим хүч, дэд бүтцийн яам хооронд хамтран ажиллах тухай санамж бичигт гарын үсэг зурав.

Талууд санамж бичгийн хүрээнд сэргээгдэх эрчим хүч, ногоон устөрөгч, цахилгаан эрчим хүч дамжуулах, түгээх сүлжээ, эрчим хүч хуримтлуулах системийн чиглэлд хамтын ажиллагааг хөгжүүлж, хөрөнгө оруулалт, хамтарсан төсөл хэрэгжүүлэхээр тохиролцов. Түүнчлэн цахилгаан эрчим хүч, ногоон устөрөгчийг бүс нутгийн зах зээлд экспортлох боломжийг судлах, туршлага, технологи солилцох, мэргэжилтэн бэлтгэх, хүний нөөцийн чадавхыг бэхжүүлэхэд хамтран ажилахыг ЭХЯ мэдээллээ.

АНЭУ-ын Дубай хотноо зохион байгуулж буй AIM Congress 2026 буюу Олон улсын хөрөнгө оруулалтын чуулга уулзалтад оролцож буй Шадар сайд Т.Доржханд Хөрөнгө оруулалтын асуудлаарх сайд нарын дугуй ширээний уулзалтын үеэр Монгол Улсын эдийн засгийн боломж, хөрөнгө оруулалтын орчин, эрчим хүчний салбарын шинэчлэл, ногоон шилжилтийн талаар танилцуулав. Мөн Абу Даби хөгжлийн сан, G42 группийн удирдлагатай уулзаж, эрчим хүчний салбарын шинэчлэл, сэргээгдэх, ногоон эрчим хүч, хөрөнгө оруулалт, дата төвийн дэд бүтэц, түүнийг найдвартай, цэвэр эрчим хүчээр хангах чиглэлээр хамтран ажиллах талаар санал солилцжээ.

Тус айлчлал нь Монгол Улсын сэргээгдэх эрчим хүчний нөөц, эдийн засгийн боломжийг АНЭУ-ын хөрөнгө оруулалт, технологи, туршлагатай уялдуулж, эрчим хүчний салбарт төсөл, хөрөнгө оруулалт татах, ногоон эрчим хүчний шинэ эх үүсвэр хөгжүүлэх, экспортын боломж бүрдүүлэх хамтын ажиллагааны шинэ суурийг тавьж буйгаараа ач холбогдолтой юм.

Нийтэлсэн огноо2026-09-10