Ерөнхий сайд Н.Учрал “Эрдэнэт үйлдвэр” ТӨҮГ-ыг түшиглэн байгуулах зэсийн баяжмал хайлуулах, боловсруулах үйлдвэрийн төсөл, "Уул уурхай-металлурги-химийн үйлдвэрийн цогцолбор" үйлдвэрлэл, технологийн паркийн талбайд ажиллалаа.

“Эрдэнэт үйлдвэр” ТӨҮГ нь Орхон аймгийн Баян-Өндөр, Жаргалант сумын нутаг дахь "Уул уурхай-металлурги-химийн үйлдвэрийн цогцолбор" үйлдвэрлэл, технологийн паркийн үйл ажиллагааны хүрээнд зэсийн баяжмал боловсруулах үйлдвэрийн төслийг хэрэгжүүлж байна.

Зэсийн баяжмал хайлуулах үйлдвэр нэмүү өртөг шингэсэн цэвэр зэс үйлдвэрлэхээс гадна, өндөр технологи шингэсэн эцсийн бүтээгдэхүүн үйлдвэрлэх, бусад дагалдах жижиг, дунд үйлдвэрийн хөгжлийг эрчимжүүлэх, дэвшилтэт технологи нутагшуулах, ажлын байр бий болгох, эдийн засгаа төрөлжүүлэх, үр ашгийг нэмэх стратегийн ач холбогдолтой төсөл гэдгийг Ерөнхий сайд Н.Учрал онцлоод, бүтээн байгуулалтыг эрчимжүүлж, 11 дүгээр сард багтааж гэрээ, хэлэлцээг дуусгахыг үүрэг болголоо. 

Үйлдвэрлэл, технологийн паркийн дэд бүтцэд 68 сая ам.долларын санхүүжилт хийж, эхний ээлжийг ашиглалтад хүлээн авч, 2027 онд бүрэн дуусгахаар төлөвлөжээ.  ҮТП байгуулах 1200 га газрыг тусгай хэрэгцээнд аваад байгаа. Тус паркт Зэсийн баяжмал хайлуулж боловсруулах, Молибденийн баяжмал боловсруулах ферромолибден, Зэс нано нунтаг, Кабель утасны үйлдвэр байгуулна.

Мөн “Оюут” дэд станцын туршилтын хугацаа үргэлжилж байна. Энэ станц ҮТП-ийг цахилгаанаар хангаад зогсохгүй, 140 гаруй сумын цахилгааны найдварт ажиллагааг хангахыг Засгийн газрын ХМОНХГ мэдээллээ. 

“Эрдэнэт өртөөнөөс 4,4 км урт төмөр зам татсанаар импортын барааг ҮТП-ийн талбайд буулгах боломжтой болсон. Эрдэнэт үйлдвэртэй төмөр замаар холбож байна. Цэвэр усны хангамж, ариутгах татуургын системээ шийдсэн. 12,7 км урт авто замын далангийн хучилт хийж байна, ҮТП-ийн эдэлбэр газрыг тойруулан хашаа барьсан” гэж Эрдэнэт үйлдвэр ТӨҮГ-ын Ерөнхий инженер Т.Батмөнх танилцуулжээ.

Нийтэлсэн огноо2026-10-11