Дэлхийн гурван агентлаг Монгол Улсын зээлжих зэрэглэлийг “тогтвортой” хэмээн дүгнэснийг Монгол Улсын Ерөнхий сайд Н.Учрал мэдээллээ.
Олон улсын зээлжих зэрэглэл тогтоогч “S&P Global Ratings” агентлаг Монгол Улсын 2026 оны зээлжих зэрэглэлийг “BB-, Тогтвортой” гэж дүгнэжээ. Түүнчлэн өнгөрсөн тав болон наймдугаар сард “Fitch Ratings” “B+, Тогтвортой”, “Moody’s Investors Service”  байгууллага “B1, тогтвортой гэж үнэлж байсан юм.
Ерөнхий сайд Н.Учрал: Энэхүү дүгнэлт нь бидний сонгосон зам зөв гэдгийг баталсан дэлхийн итгэлцэл юм. Манай улс сахилга бат хариуцлагаа дээшлүүлж, эдийн засгаа эрүүлжүүлэх зөв зам дээрээ ирж байна. Түлш шатахууны доголдол, хомсдол, үнийн өсөлт бол хөлөг онгоцны тавцанг мөргөх түр зуурын далайн давлагаа юм. Монгол Улс ижил түвшний эдийн засагтай улсуудаас өндөр хурдтай урашилж байна. Энэ жилийн УИХ-д өргөн мэдүүлсэн төсвийн тодотгол, ирэх жилийн төсөв нэг төсөвтэй байхын тод илэрхийлэл болсон. Олон жил төсвөөс гадуур явж ирсэн Төрийн өмчит компанийн цэвэр ашгийг нэгдсэн төсөвтөө багтааж өрхийн орлогыг баталгаажуулах шинэ жишгийг тогтоож байна. Шинээр батлагдсан Татварын хуулийг хэрэгжүүлснээр хамгийн багадаа 15 мянган шинэ ажлын байр бий болох бололцоотой. 17 жилийн дараа Оюу толгойн ногдол ашгийг авахаар харилцан тохиролцож, ирэх оны төсөвт тусгасан. Ногдол ашгийг хуримтлалын санд төвлөрүүлнэ. Ирэх долоо хоногоос олон  нийтийн дунд нээлттэй санал асуулга явуулж баялгийн  эзэн  иргэн бүрийн саналыг тусгахаар зорьж байна.
Сангийн сайд З.Мэндсайхан: Зээлжих зэрэглэлийг ингэж үнэлсэн нь олон улсад, хөрөнгө оруулагчдад өгч байгаа хамгийн том мсж гэж ойлгох хэрэгтэй. Эдийн засгийг солонгоруулах хэрэгтэй гэж ярьдаг. Үүнийг ажил хэрэг болгоход тулгамдаж байгаа асуудлын нэг нь эрчим хүчний салбарын хөгжил. Иймээс Оюу толгойн ногдол ашгийн 2 их наядыг эрчим хүч, дулааны асуудлаа шийдэх зорилгоор 2027 оны төсөвт тусгасан. Суурь дэд бүтцийн асуудлаа шийдэж байж цаашид эдийн засгаа улам тэлэх солонгоруулах суурийг тавина гэв.

Рэгзэдмаа ЭРДЭНЭЧИМЭГ

Р.Эрдэнэчимэг нь 2022 онд Их засаг их сургуулийг сэтгүүлч мэргэжлээр төгссөн бөгөөд 2026 оноос iToim.mn сайтад ажиллаж байна.

Нийтэлсэн огноо2026-10-11