Дүүжин замын тээвэр төслийн бүтээн байгуулалтын ажлын явц 33 хувьтай үргэлжилж байна. 
Энэхүү бүтээн байгуулалт нь Улаанбаатар хотыг хөгжүүлэх 24 мега төслийн хүрээнд авто замын түгжрэлийг бууруулах зорилготой юм.
Ажлын явцын талаар Нэгдсэн төслийн удирдлагын газар ОНӨТҮГ-ын Дүүжин замын тээвэр төслийн ахлах инженер Г.Түвшинсанаа ярихдаа “Дүүжин замын тээврийн тулгуур багана нийт дөрвөн хэсгээс бүрдэх юм.Үүний нэг хэсэг болох суурь нь шон, холбогч хавтан, төмөр бетонон баганан суурь бүхий гурван хэсгээс бүрдэж байна. Өнөөдрийн байдлаар өрөмдлөгийн шон суурийн ажлыг бүрэн дуусгаж, удаах хоёр суурь байрлуулах ажил 55 хувьтай үргэлжилж байна” гэв.
Харин “Моннис Инженеринг” компанийн Төслийн менежер Б.Мөнхбаясгалан ярихдаа, “Төслийн хүрээнд хийх нийт 19 тулгуур баганаас Туул голын ай савд байрлах зургаан багана суурийг бүрэн байрлуулж дууссан. Ийнхүү өнөөдрөөс тус байршлуудад металл хийцлэлийн угсралт буюу үндсэн тулгуур баганыг суурилуулах ажлыг эхлүүлээд байна. Мөн наймдугаар сард багтаан бүх суурийн ажлыг дуусгахаар төлөвлөж байгаа” гэлээ.
Түүнчлэн бүтээн байгуулалтын ажилд 70 гаруй инженер, техникийн ажилтан дүүжин замын тээврийн трасс дагуу 21 байршилд ажиллаж байна. Барилга угсралтын ажлыг энэ оны арванхоёрдугаар сард бүрэн дуусгаж, ирэх оноос туршилтад оруулсны дараагаар улсын комисст хүлээлгэн өгөхөөр төлөвлөж байгаа аж.
Яармаг-Хархорин чиглэлд 4.2 км үргэлжлэх дүүжин замын тээвэр хоёр зогсоолтой, 98 кабинтай байх бөгөөд нэг кабиндаа 10 зорчигчийн багтаамжтай, цагт 2320 зорчигч тээвэрлэх хүчин чадалтай байх юм. Мөн аялах хугацаа 11 минут, тулгуур баганын өндөр 6.45-42 метр, тээвэрлэх хурд 21 км/цаг байна. Уг бүтээн байгуулалт ашиглалтад орсноор оргил цагийн үеийн хөдөлгөөний ачаалал, Яармаг, Нисэхийн түгжрэлийг 15 хувиар бууруулж улмаар замын хөдөлгөөний дундаж хурдыг дөрвөн хувиар нэмэгдүүлэх талаар албаныхан онцоллоо.

Нийтэлсэн огноо2025-07-22