АНУ-ын Зүүн Азийн бодлогыг хариуцсан дээд түвшний дипломат ирэх долоо хоногт БНСУ, Япон, Монгол гэсэн улсуудад айлчилж, Энэтхэг-Номхон далайн бүс нутагт “нийтлэг тэргүүлэх зорилтууд”-ын хүрээнд хамтын ажиллагааг бэхжүүлэхээр төлөвлөж байгаа талаар АНУ-ын Төрийн департамент мэдэгдлээ.
Гуравдугаар сарын 17 хүртэл үргэлжлэх энэхүү айлчлалын үеэр АНУ-ын Төрийн департаментын Зүүн Ази, Номхон далайн асуудал хариуцсан туслах төрийн нарийн бичгийн дарга Майкл ДеСомбр Токио, Сөүл, Улаанбаатар хотуудад айлчилна гэж Төрийн департаментын Зүүн Ази, Номхон далайн асуудал хариуцсан товчоо X платформд нийтэлсэн мэдэгдэлдээ дурджээ.
Майкл ДеСомбрын Зүүн Хойд Азийн энэ айлчлал нь Дональд Трамп АНУ-ын ерөнхийлөгчийн хувиар БНХАУ-д айлчилж, Ши Жиньпинтэй дээд хэмжээний уулзалт хийхээр төлөвлөж байгаа гэх мэдээлэл гарсан цаг үед тохиож байна. Уг уулзалт гуравдугаар сарын сүүлээс дөрөвдүгээр сарын эхэн хооронд болох магадлалтай бөгөөд Трамп Ази дахь айлчлалынхаа үеэр Ким Жон Унтай дахин яриа хэлэлцээ эхлүүлэхийг оролдож магадгүй гэсэн таамгийг төрүүлээд байна.
Саяхан болсон намын чухал их хурлын үеэр Ким Жон Ун “хэрэв Вашингтон дайсагнасан бодлогоо зогсоовол БНАСАУ АНУ-тай харилцаагаа сайжруулахгүй байх шалтгаан байхгүй” хэмээн мэдэгдсэн байна. Тэрбээр АНУ-БНАСАУ-ын харилцааны ирээдүй “бүрэн дүүрэн АНУ-ын хандлагаас хамаарна” гэж онцолсныг Умард Солонгосын төрийн хэвлэлүүд мэдээлжээ.
Эх сурвалж: Korea Times

By Хүрэлбаатар БЯМБАЖАРГАЛ
Х.Бямбажаргал нь МУИС-ийг Олон улсын харилцаа мэргэжлээр төгссөн бөгөөд 2024 оноос iToim.mn сайтад сэтгүүлч, орчуулагчаар ажиллаж байна.

Нийтэлсэн огноо2026-03-06