Монгол хэл бичгийн шалгалт өнгөрсөн долоо хоногт болж шалгалтад эротик өгүүллэг ирсэн нь олны анхаарлыг ихээхэн татсан билээ. Энэ талаар Боловсролын сайд Л.Энх-Амгалан: “Монгол хэлний шалгалтын агуулга сая маш их дуулиан дэгдээлээ. Ц.Доржготов гуайн эротик өгүүллэг оруулсан байна. Төгсгөл хэсэг рүүгээ маш эротик өнгө аястай бүр цаашлаад согтууруулах ундаа хэрэглэсэн хүнийг сурталчилсан гэх мэт асуудал гарлаа. Үүн дээр ажлын хэсэг гарсан, ЭЕШ-ын агуулгыг сайжруулна.

Цаашид Монгол хэлний шалгалтын агуулгыг сайжруулах шаардлагатай байна. Мөн сурагчдын зайлшгүй унших ёстой сурах бичиг, номнуудыг зогсоосон байгааг нэмэгдүүлнэ. Ер нь монгол хүүхдийн уншаад ойлгох чадварыг нэмэхгүй бол ирээдүйд маш том асуудал үүснэ. Эх хэлээрээ уншиж ойлгох чадварыг англи хэлнээс нэн тэргүүнд тавих ёстой” гэсэн тайлбар мэдээллийг өглөө.

Харин экс Боловсролын сайд П.Наранбаяр өгсөн тайлбартаа “ЭЕШ-ын материал нууцлаг байдаг учраас сайд мэдэх боломжгүй байсан. Ёс зүйн, үг хэллэгийн хувьд анхаарах ёстой. Эротик эсэхийг ажлын хэсэг нь дүгнэх байх” гэв

Нийтэлсэн огноо2026-04-13