Өрөмдлөгийн явцад хоёр дахь цооног нь эхнийхээсээ илүү их хийн нөөцтэй байгааг тогтоожээ
Австралийн Хөрөнгийн биржид бүртгэлтэй “Jade Gas Holdings” компани Өмнөговь аймаг дахь нүүрсний давхаргын метан хийн "Улаан нуур" төслийн талбайдаа хоёр дахь хэвтээ цооногоо амжилттай өрөмдөж, 802 метр зузаантай хийт нүүрс огтолсноо мэдээллээ. Ингэснээр тус компанийн сүүлд өрөмдсөн хоёр хэвтээ цооногоос илэрсэн хийт нүүрсний зузаан нийлээд 1500 метр хүрч байна.
Энэхүү мэдээллийн дараа “Jade Gas Holdings” компанийн хувьцааны ханш Австралийн Хөрөнгийн биржид дахин 20 хувь давж өслөө.
Одоогоор хоёр цооногт үйлдвэрлэлийн тоног төхөөрөмж суурилуулж байгаа бөгөөд 3–4 долоо хоногийн дотор хий олборлож эхлэхээр байгааг “Jade Gas Holdings” мөн онцолжээ. Түүнчлэн тус компани олборлосон хийгээ “CNG” буюу байгалийн шахсан хий үйлдвэрлэгч компанид арилжааны зорилгоор нийлүүлэх яриа хэлэлцээ үргэлжилж байгааг мэдээлсэн байна.
"Үйлдвэрлэлийн өрөмдлөгийн үр дүнд “Улаан нуур” төсөл ирээдүйд дэлхийн зэрэглэлийн хийн орд болох итгэл маань баталгаажлаа. Бид эхний хоёр цооногийн ажлыг аль болох эрт дуусгаж, олборлолтоо эхлүүлэх болно" хэмээн “Jade Gas Holdings”-ийн ТУЗ-ийн дарга Деннис Мортон өгүүлсэн байна.
Харин байгалийн хийн "Номгон" төслийг эзэмшдэг “Elixir Energy” компани хувьцааны арилжаагаа дөрөвдүгээр сарын 15-ны өдөр түр зогсоох хүсэлтээ Австралийн Хөрөнгийн биржид гаргасан байна.
Тус компани удирдлагын бүтцэдээ өөрчлөлт оруулсан тухайгаа мэдэгдэл гаргахаар төлөвлөж байгаа аж. “Elixir Energy” Монголд эзэмшдэг байгалийн хийн хайгуул болон сэргээгдэх эрчим хүчний төслийнхөө тодорхой хувийг өөр компанид шилжүүлэн өгөх "farm-out" гэрээ байгуулж байгуулаад байгаа юм.

Нийтэлсэн огноо2025-04-11